BUTUAN CITY – Pabiling ipatuman dinhi sa dakbayan sa Butuan ang Executive Order No. 31 nga nagbutang sa entiro siyudd sa state of Modified General Community Quarantine kon MGCQ.
Kini base na sa gipagawas nga desisyon kagabii sa Inter-Agency Task Force kon IATF kalabot sa bag-ong status sa tanang mga lugar sa nasud tungod gihapon sa nagtunhay nga COVID-19 pandemic.
Kagabii usab, gipirmahan ni Butuan City Mayor Ronnie Vicente Lagnada ang Executive Order No. 35 nga naglugway sa effectivity sa MGCQ dinhi sa siyudad aron malikayan ang pagkaylap pa sa COVID-19.
Ang desisyon sa IATF, nagbasura sa hangyo usab sa city government nga ipa-ilalom sa modified enhanced community quarantine kon MECQ ang 33 sa 86 ka mga barangay ning siyudad samtang i-GCQ usab unta ang nahabilin pang uban.
Kini tungod na usab sa padayong pagsaka sa COVID-19 cases ning siyudad nga mugna sa nanguling Caraganons nga stranded sa Cebu City, Metro Manila ug ubang bahin sa Luzon.
