BUTUAN CITY – Giklaro ni Ariem Cinco – tigpamaba sa Department of Education kon DepEd-Caraga nga dili nila i-require ang face-to-face nga pagsulod sa klase sa hingpit na nga pagbukas sa school year 2020-2021 karong Agusto 24.
Kini isip pagsunod sa DepEd sa kamanduan ni Pangulong Rodrigo Duterte nga dili ma-reporton sa tunghaan ang mga estudyante hangtud nga wala pa’y libreng bakuna kontra COVID-19 nga ihatag kanila.
Tungod niini, gipadayag ni Cinco sa eksklusibong pakighinabi sa Bombo Radyo Butuan, nga himuon ang pagbukas sa klase online o kaha sa blended learning gamit ang telebisyon o kaha radyo diha sa paghatag og instruction kon modules gikan sa mga magtutudlo.
Aminado si Cinco nga dakong hagit sa ahensya ilabina sa mga magtutudlo ang bag-ong mga learning modality rason nga nag-craft karon ang ahensya og basic education learning continuity plan aron magpadayon ang pagtuon sa mga bata taliwa sa nagtunhay karong pandemya.
Gitutukan karon sa DepEd ang maong mga hagit aron makuha-kuhaan ang mamahimo unyang impact niini ngadto sa pagtuon sa mga bata uban sa pag-abag sa mga stakeholders, mga ginikanan ingon man sa ilang mga partners sa pribadong sektor.
Giklaro pa sa opisyal nga ang makuha lang gikan sa traditional learning mao kadtong mga kalihukan sa mga estudyanteng magkinahanglan og mass gathering tungod kay hugot man kining gidili sa kasamtangang sitwasyon karon dililang sa nasud kondili sa tibuok kalibutan.
