BUTUAN CITY – Nasubo man apan andam dawaton sa Department of Health kon DOH-Caraga uban sa mga hingtungdang local health officials ug mga local chief executives ang laing natalang walo ka mga bag-ong COVID-19 positives ning rehiyon.
Kini human nakumpirma sa gipadalang resulta sa RT-PCR test gikan sa Southern Mindanao Medical Center kondiin dili kini mga local transmissions kondili mga kasong gikan sa Returning Overseas Filipinos kon ROFs ug Locally Stranded Individuals kon LSIs nga gikan sa dagkong siyudad sa nasud human na-stranded panahon sa lockdown tungod sa pandemya.
Sa eksklusibong pakighinabi sa Bombo Radyo Butuan, gipadayag ni DOH-Caraga regional director Dr. Jose Llacuna Jr. nga sa walo ka mga bag-ong kaso, lima niini ang taga-Butuan City, duha sa Buenavista, Agusan del Norte ug usa sa Surigao City.
Wala matud pa’y angayang kabalak-an ang katawhan tungod kay sukad sa pag-uli sa maong mga ROFs ug LSIs, fideretso man sila ngadto sa mga quarantine facilities nga gi-andam sa mga local government units diin sila nagpuyo.
