BUTUAN CITY – Landig sa pribadong balay tambalanan ang upat ka magtutungha human nadaro sa usa ka pribadong sakyanan pasado alas-tres sa hapon samtang nangisnak sulod sa usa ka fastfood chain nga nahimutang sa dalan JC Aquino Ave. ning dakbayan sa Butuan.
Sa eksklusibong pakighinabi sa Bombo Radyo Butuan kang Norshapy Bangga – supervisor sa Dunkin Donut, kalit lang nga nidasmag ang padulong unta nga mu-parking nga sakyanan ug mi deretso sa samin sa ilang kan-anan.
Sa maong hitabo angol ang usa ka estudyante nga nagtindog sa gawas ug laing 3 nga nangisnak sa sulod.
Gilayong gidala sa pribadong balay tambalan ang mga biktima diin duha niini ang kumpirmadong na-admit tungod sa nahi-agumang injuries.
Saysay pa sa driver nga si Jocelyn Paparella, 39 anyos residente sa Brgy. San Vicente, Butuan City, aksidente niyang natumban ang gasolinador hinungdan nga niambak ang iyang sakyanan ngadto sa mga biktima.
Gawas sa mga naangol nabuak sa maong insidente ang usa ka bloc sa samin sa nasangpit nga fastfood chain ug nalumping ang simod sa sakayanan.
Hinuon mipasalig si Paparella nga tubagon ang tanang galastusan sa ospital ug damyos sa fast food chain human sa maong insidente.
