BUTUAN CITY- Subling mitala na usab og taas nga ihap sa COVID-19 ang Caraga Region ning adlawa kondiin moabot sa 70 ang mga bag-ong kumpirmadong kaso kondiin 54% sa mang ihap ang anaa sa edad nga 21 ngadto sa 50 anyos samtang 53% kon 35 ang babae ug 47% kon 33 ang mga lalaki.
Sa maong ihap, duha ang natala sa Agusan del Norte nga mitala og tag-usa sa Carmen ug Nasipit; 4 ka kaso usab sa Bayugan City, usa sa Brgy. Tolosa, Cabadbaran City, samtang 3 sa Agusan del Sur nga gilangkuban sa 2 ka kaso sa lungsod sa Bunawan ug usa sa San Francisco, 9 usab sa Surigao City pinaagi sa Washington dunay 4, Taft- 3, ug Luna-2. Sa Bislig City usab dunay 4 kondiin 3 ang sa Brgy. Mangagoy ug 1 sa Brgy. Tabon.
Pinakadaghan sa Butuan City nga mi-aot sa 47 ka mga kaso nga gilangkuban sa Libertad-8, Villa Kanangga-6, ug tag upat sa Bading, Doongan, ug Masao samtang tag duha sa Ampayon, Baan KM3, Dagohoy, J.P Rizal, MAon, ug Tagabaca, ug tag-usa usab sa Agusan Pequeño, Ambago, Banza, Bayanihan, Bilay, Limaha, San Vicente, Taguibo ug Tiniwisan.
Gikan sa maong ihap, 63 niini ang mga local transmission kondiin 31 ang bag-ong local transmission ug duna’y close contact sa mga kanhi nagpositibo sa maong sakit, ug usa ka health worker.
Samtang sa laing klasipikasyon, 3 ang dunay travel history, 2 ang dunay close contact, ug 2 ka frontliner kondiin 37 sa mga niini ang asymptomatic, 28 ang mild, 4 ang severe ug 1 ang critical.
Sa karun ang 70 ka mga bag-ong kaso gipailalom na sa kwarantina, gi-monitor ug gi-atiman.
Ning adlawa usab nakatala og 3 ka mga bag-ong namatay sa COVID-19 nga gilangkuban sa usa ka 68 anyos nga lalaki gikan sa Bacuag, Surigao del Norte kinsa dunay problema sa kasing-kasing, kalit nga paglisud sa gihawa niadtong Septembre 17 ug na-admit niadtong Septembre 22 apan tungod sa komplikasyon sa pasyente, namatay kini niadtong Oktubre 7.
Ang ikaduha mao ang 95-anyos nga lalaking gikan sa Surigao City kinsa wala’y comorbidity, apan kalit nga gi-ubo, naglisud pagginahawa niadtong Septembre 27 rason nga gi-admit niadtong Septembre 29 apan tungod usab sa komplikasyon namatay kini niadtong Oktubre 6.
Ang ikatulo mao ang 66-anyos nga babae gikan sa Butuan City kinsa wala’y comorbidity, kalit nga naglisud sa pagginhawa niadtong Oktubre ug na-admit niadtong Oktubre 6 ug kini namatay pagkasunod adlaw.
Sa kasamtangan ang kinatibuk-ang kaso sa COVID-19 sa Caraga, mu-abot na sa 1,741 kondiin 1,126 ang recoveries, 545 ang aktibong kaso ug 70 na ang patay.
