BUTUAN CITY – Gi-dismiss ni Judge Madonna Echiverri sa Quezon City Regional Trial Court ang ₱1 bilyon nga civil case nga gipasaka batok nila House Speaker Martin Romualdez, kanhi Ako Bicol Partylist Rep. Zaldy Co, Rep. Patrick Michael Vargas, mga opisyal sa Department of Public Works and Highways kon DPWH ug mga kontraktor.
Kini tungod kay wala mabayri ang filing fees sa kasong gipasaka ni Antonio Enrile Inton Jr. alang sa grupo nga United People’s Against Corruption (UPAC) may kalabutan sa anomalya sa mga flood control projects sa Quezon City.
Base sa balaud, kung dili mabayran ang fees, wala’y hurisdiksyon ang korte, mao nga dili makapadayon ang kaso. Gika-ingon nga ang distrito ni Vargas nakadawat og ₱944.6 milyon matag tuig kon bugti sa ₱2.86 bilyon gikan niadtong tuig 2023 hangtud 2025 alang unta sa flood control projects sa Northeastern Quezon City nga gilangkuban sa Novaliches-Fairview, Commonwealth Avenue, Quirino Highway, ug Regalado Avenue.
Apan bisan pa man sa daghan og pondo, nagpadayon gihapon ang pagbaha ug gamay ra matud pa ang kausaban nga nakita sa maong mga proyekto.
Giklaro usab sa korte nga ang kaso wala gi-dismiss tungod kay walay basehan ang reklamo, kundili tungod sa teknikal nga rason – ang wala mabayri nga filing fees.
