BUTUAN CITY- Gipadayag ni Ukrainian President Volodymyr Zelensky nga minghangyo kini sa Estados Unidos nga ibaligya sa ilaha ang 5 hangtod 10 porsyento sa ilang Patriot interceptor missiles aron mapalig-on ang depensa batok sa mga pag-atake sa Russia.
Sigon ni Zelensky, kung makakuha ang Ukraine og lima ka porsyento sa maong mga missile, makatabang kini sa ilang nasud nga makalahutay sa umalabot nga tingtugnaw ug makaluwas og mga kinabuhi, samtang kung 10 porsyento ang ilang makuha, posibleng mapugngan ang tanang ballistic missiles nga itira sa Russia.
Ang Patriot interceptor missiles gigamit isip air-defense system aron mapugngan o mapukan ang mga ballistic missile ug uban pang hulga sa kahanginan sa dili pa makaabot sa ilang target.
Sumala ni Zelensky, gamay pa ang kasamtangang suplay sa Ukraine kumpara sa ilang panginahanglan, hinungdan nga padayon silang nangayo og dugang nga air-defense missiles gikan sa ilang mga kaalyado.
