BUTUAN CITY- Mingsaka na sa 132 ka tawo ang patay ug kapin 480 ang angol human ming-igo ang magnitude 7.4 nga linog sa Colombia, hinungdan sa pagkahugno sa daghang mga building ug pagdeklarar sa nasud og state of emergency.
Sumala sa Colombian Geological Service, miigo ang linog alas-7:34 sa buntag sa lokal nga oras sa giladmon nga 103 kilometers, uban sa sentro sa linog duol sa San José del Palmar sa Chocó province, apan kusog usab kining nabati sa daghang bahin sa kasadpang Colombia. Usa sa pinakagrabeng naapektuhan mao ang Pereira, diin labing menos 40 ang namatay ug 65 ka building ang nahugno, samtang gituohang adunay mga tawo nga natanggong sa 15 niini.
Naapektuhan usab ang Cali, Manizales, Quibdó ug Medellín, lakip ang pipila ka mga airport nga nakasinati og kadaot, samtang nabati ang mga pag-uyog hangtod sa Venezuela, Ecuador ug Panama.
Gideklarar ni Colombian President Abelardo de la Espriella ang national disaster situation aron mapadali ang pagresponde sa gobyerno, samtang nagpadayon ang search and rescue operations ug gipaabot nga mosaka pa ang ihap sa mga namatay tungod sa posibleng mga tawo nga natanggong ilawom sa naguba nga mga estruktura.
