BUTUAN CITY – Gi-ampo sa lider sa Simbahang Katoliko nga si Pope Leo XIV ang mga biktima sa kusog nga linog nga mi-igo sa Colombia nga mikalas na sa kinabuhi sa kapin 250 ka tawo ug mi-angol sa kapin 1,000 pa.
Gipahayag sa Santo Papa sa iyang dakong kasubo human sa linog nga mi-igo sa nagkalain-laing bahin sa nasod dayong halad og pag-ampo alang sa “eternal rest” o walay katapusang pahulay sa mga namatay, ug alang sa daling pagkaayo sa tanang mga na-angol.
Nagpaabot usab si Pope Leo og kinasing-kasing nga pahasubo ngadto sa mga pamilya nga nagbangutan tungod sa pagkawala sa ilang mga minahal sa kinabuhi.
Nagpasalamat usab kini sa tanang nagtrabaho ug walay kakapoy sa search and rescue operations, ingon man sa mga naghatag og relief assistance ngadto sa mga naapektuhan sa linog.
Sa kataposan, nag-ampo ang Santo Papa, pinaagi sa panabang sa Mahal nga Birheng Maria, nga hatagan og espirituwal nga kusog ug paglaom ang katawhan sa Colombia.
Gipadala sa Santo Papa ang maong mensahe pinaagi sa usa ka telegrama nga gipirmahan ni Cardinal Secretary of State Pietro Parolin ug gipa-abot kang Archbishop Francisco Javier Múnera Correa sa Cartagena, nga presidente sa Colombian Bishops’ Conference.
.
