BUTUAN CITY – Laing sunog na usab ang mi-ulbo sa Surigao City, lalawigan sa Surigao del Norte kagahapong adlawa diin gibana-banang 100 ka mga pamilya ang na-apektuhan human na-ugdaw ang 75 ka panimalay sa Barangay Taft, dihang mi-ulbo ang kalayo pasado alas 12:50 sa udto.
Paspas nga mikaylap ang kalayo sa nagtapok nga mga panimalay sa Purok Zenia, Nueva Extension tungod sa ka-init sa panahon og kusog nga huyop sa hangin kondiin misaka sa 5th alarm ang maong sunog.
Ang mga nasunugan temporaryong gipahiluna sa Nueva Gym samtang nag-profiling gilayon ang taga-City Social Welfare and Development Office.
Nasuta nga ang tinubdan sa pag-ulbo sa kalayo mao ang linuto nga paklay ni Ramonito “Dodong” Bolandrina Romero sulod sa iyang panimalay dihang migawas siya og makadiyot tungod kay dunay mipalit sa iyang display nga sud-an ug sa iyang pagbalik, mi-ulbo na ang kalayo sa iyang kusina.
