BUTUAN CITY – Anaa na sa katapusang yugto ang gilusad nga rescue operations sa Colombia human ang makamatay nga linog niadtong Lunes kondiin misaka na sa 265 ang ihap sa mga namatay, samtang kapin 3,500 pa ang nasamdan.
Hapit na maabot sa mga rescue teams ang 72-oras sukad nahitabo ang linog kondiin kini ang panahon nga gi-isip ang posibilidad nga duna pa’y makit-ang buhi sa mga natanggong ilalom sa mga naguba nga buildings.
Ang 7.4 magnitude nga linog mao ang pinakakusog nga linog nga mi-igo sa Colombia karon nga siglo kondiin hapit 500 ka mga tawo ang padayon nga missing, samtang kapin 9,550 ka kabalayan ang naguba.
Sa Pereira diin natala ang sentro sa coffee region sa Colombia, 83 ang namatay samtang sa Cali, ang ikatulong pinakadakong siyudad sa nasod, duna’ynatalang 74 ang patay.
Misaad usab si Presidente Abelardo de La Espriella nga magtukod og emergency fund aron matabangan ang pagpatukod pag-usab sa mga ospital, eskwelahan, balay ug mga imprastraktura nga nadaot tungod sa linog.
Gideklarar usab ni de La Espriella ang economic emergency aron matubag ang mga kadaot nga namugna sa linog, bisan pa nga wala niya espesipikong gipadayag kung unsang mga lakang ang ipatuman.
