BUTUAN CITY – Ipailalom na usab sa yellow alert ang Visayas Grid karong gabii, gikan sa alas-5:00 sa hapon hangtod alas-8:00 karong gabii tungod kay adili magamit ang pipila ka dagkong coal-fired power plants, nga gisabayan pa sa limitado nga pag-import og kuryente gikan sa Mindanao.
Sumala sa advisory nga gipagawas sa National Grid Corporation of the Philippines (NGCP), adunay 2,350 megawatts (MW) nga available capacity sa Visayas Grid, samtang gilauman nga moabot sa 2,276 MW ang peak demand.
Nagpasabot kini nga gamay ra ang operating margin o reserbang kuryente nga magamit kansa importante aron adunay ikapasa kung kalit nga madaot o mohunong ang operasyon sa pinakadakong power plant.
Sa yano nga pagkasulti, hapit na maabot sa konsumo sa kuryente ang kapasidad nga available, mao nga gipahibalo ang yellow alert aron ma-andam ang grid sa posibleng kakulang sa suplay sa kuryente.
