BUTUAN CITY- Kapin 180 ka lugar sa amihanang Luzon ang gibahaan tungod sa kusog nga ulan nga dala sa Southwest Monsoon o Habagat, sumala sa Office of Civil Defense (OCD) niadtong Domingo.
Sigon ni OCD Deputy Administrator Bernardo Rafaelito Alejandro IV, mokabat sa 182 ka lugar ang gikataho nga nabahaan, lakip ang mga lugar sa CALABARZON ug MIMAROPA, samtang adunay mga landslide ug rockslide nga namonitor ilabina sa Region 1 ug Cordillera Administrative Region (CAR), lakip ang Benguet ug Baguio City.
Mokabat usab sa 110,000 ka pamilya ang naapektuhan sa pagbaha, diin 2,200 ka pamilya o 7,300 ka indibidwal ang nagpabilin sa 86 ka evacuation centers.
Unom ka tawo ang namatay samtang pito ang naangol, ug wala pay gikatahong missing. Samtang, 569 ka local government units ang mipatuman na og class suspension tungod sa epekto sa dili maayong panahon.
Mipasidaan usab ang PAGASA nga magpadayon ang Habagat sa pagdala og mga pag-ulan sa Metro Manila, Luzon ug pipila ka bahin sa Visayas, lakip ang Ilocos Sur, La Union, Abra, Benguet, Zambales, Bataan ug Occidental Mindoro.
