BUTUAN CITY – Gipamugos ni House prosecutor ug Bicol Saro Party-list Rep. Terry Ridon nga dili mahimong ipasa ni Vice President Sara Duterte ngadto sa iyang mga sakop ang responsibilidad sa gika-ingong sayop nga paggamit sa confidential funds.
Sumala ni Ridon, dili mahimong basulon lamang ang mga Special Disbursing Officers (SDOs) o accountants, tungod kay gikinahanglan ang pirma sa hepe sa ahensya sa dili pa mapagawas ang kwarta o ma-isyu ang tseke.
Dugang ni Ridon, adunay testimonya nga ang kataposang pag-apruba sa pagpagawas sa confidential funds gikan mismo sa bise presidente.
Madumdumang mukabat sa P612.5 milyon ang confidential funds nga gisusi kondiin P500 milyon niini alang sa Office of the Vice President ug P112.5 milyon usab ang alang sa Department of Education sa panahon nga si Duterte ang secretary sa edukasyon.
Sumala sa prosecution, kulang ang mga dokumento nga makapasabot kung nganong gipagawas ang ingon niini kadakong kantidad sa kwarta.
Gipamugos ni Ridon nga kinahanglan matino kung kinsa gayud ang responsable sa paggamit sa pondo ug dili lamang ang mga ordinaryong kawani ang papas-anon sa responsibilidad.
