BUTUAN CITY – Padayong nangandam ang kadumalahan sa Barangay Baan km-3 ning siyudad sa Butuan alang sa mga kalihukan alang sa ika-18 nga pagsa-ulog sa Adlaw Hong Baan Km. 3 ug Unaw Festival.
Sigon ni Jerald Galario, Sangguning Kabataan kon SK Kagawad sa maong barangay, himoon ang usa ka semana nga selebrasyon karung Hunyo 22 ngadto sa 27 ning tuiga.
Sa Hunyo 22 sa buntag, himoon ang motorcade nga sundan sa opening program sa hapon diin himoon usab ang presentasyon sa mga kandidato sa Mutya Hong Baan, mga programa ug kalingawan.
Sa Hunyo 23 himoon ang Mutya Talent Night samtang sa Hunyo 24 ang Barangay Night diin mahitabo usab ang Battle of the band, tawag ng tanghalan og uban pang kalingawan.
Himoon ang coronation night sa Hunyo 26 alang sa 10 ka kandidata sa Mutya Hong Baan samtang sa Hunyo 27 usab ang Unaw Festival Street Dancing Competition ug showdown lakip na ang boak making contest diin ipasegarbo ang mga payag nga gigama sa matag-cluster sa barangay.
Kini gawas pa sa basketball league nga gisugdan niadtong Hunyo Uno og volleyball sa Hunyo 21 lakip na ang badminton tournament.
Gi-imbitar usab ni Galario ang mga vendors nga moapil sa himoong night market sugod ugmang adlawa sa Festival Grounds sa Purok-9 sa maong barangay.
