BUTUAN CITY – Wala pa’y natumbok nga persons of interest ang Surigao del Sur Police Provincial Office kalabot sa pagpusil-patay sa assistant project manager sa mining company nga Strong Group Mining Corporation kon SGMC nga nahimutang sa lungsod sa Carrascal.
Kini ang gikumpirma ni police provincial director Col Jeffrey Lawrence Mauricio human nga napalgan nang wala’y kinabuhi kagahapon sa alas-sais sa buntag sa national highway sa Brgy Bacolod ang 48-anyos nga biktimang si Philip Engbino, lumad nga taga-Minglanella, Cebu ug temporaryong nagpuyo sa SGMC compound nga nahimutang sa Purok Kaayongan, Brgy Adlay sakop sa maong lungsod.
Sa eksklusibong pakighinabi sa Bombo Radyo Butuan, gipadayag ni Col Mauricio nga nagpadayon pa ang ilang pagpanguha og dugang mga ebidensya sama sa CCTV footages gikan sa pagbiya sa b iktima sa maong kompanya niadto pang Sabado sa alas-4:34 sa hapon hangtud na sa dapit diin kini napalgan sulod sa service vehicle sa kompanya.
Migawas sa inisyal nga imbestigasyon nga wala na sa posisyon sa biktima ang iyang cellphone ug pitaka samtang pugsanong gitangtang gikan sa sakyanan ang dash camera.
Gikonsidera usab nila ang ubang mga anggulo nga posibleng makatabang paggukod sa responsable human migawas sa inisyal nga imbestigasyon nga aduna matud pa kini nakalalis nga pipila ka mga empleyado human gikunhuran ug giputol ang ilang mga benepisyo.
Madumdumang migawas sa inisyal nga imbestigasyon sa kapulisan nga napalgan ang usa ka kolor puti nga pick-up nga gipanag-iyahan sa maong kompanya ug duna’y agi sa pinusilan sa windshield nga dapit sa panig sa driver.
