BUTUAN CITY – Gikumpirma sa Department of Heath kon DOH nga nakatala na ang nasud og usa ka bag-ong kaso sa mpox kansa naila kaniadtong monkeypox ug natala kagahapon Agusto 18 – nga maoy una karong tuiga rason nga mi-abot na sa 10 ang kinatibuk-ang kaso niini sa tibuok nasud.
Ang katapusang kaso sa mpox dinhi sa nasud, natala niadtong Disyembre 2023 kondiin ang tanang mga pasyente parehong nakarekober.
Ang bag-ong kaso, usa ka 33-anyos nga lalaki nga wala’y travel history gawas sa Pilipinas apan duna kini close, intimate contact tulo ka semana adiser mitumaw ang mga simtomas.
Nagsugod pagtumaw ang mga simtomas kapin usa ka semana na ang nakalabay pinaagi sa hilanat ug paglabay sa upat ka mga adlaw, duna na’y rashes ang iyang nawong, likod, tangkugo, kamot ug mga palad.
Wala gitumbok sa DOH ang tukmang lokasyon sa bag-ong kaso sa mpox apan natala kini sa usa ka government hospital diin gikolekta ang mga specimens gikan sa mga butoy-butoy sa panit ug gisusi gamit ang real-time polymerase chain reaction (PCR) test.
Sigon sa DOH, mutapot ang mpox sa tawo pinaagi sa close o kaha intimate contact sa tawong infected niini o kaha mga gamit nga kontaminado niini sama sa mga sapot, kutsilyo apil na sa mga infected animals.
