BUTUAN CITY – Ang Vitamin D, nga kasagaran makuha pinaagi sa pagbuwad og makadiyot sa silaw sa adlaw, ug sunod sa pagkaon sama sa isda nga tambok ug mga produkto sa gatas, adunay dakong papel sa atong panglawas.
Nasuta sa mga nangaging pagtuon nga ang kakulang sa Vitamin D, makapadugang sa risgo sa pipila ka mga sakit, lakip na ang type 2 diabetes.
Migawas karon sa usa ka bag-ong pagtuon nga ang mga suplemento sa Vitamin D makatabang sa paglangan o pagpugong sa pag-uswag sa sakit sa mga tawo nga adunay prediabetes ug adunay espesipikong liwat sa ilang Vitamin D receptor gene.
Ang mga nangaging panukiduki nagpakita nga ang Vitamin D importante para sa kahimsog sa bukog, lakip na ang pagpahugot sa bukog ug pagpugong sa mga problema sa kaunoran sama sa pagkaluya sa mga kaunoran, ug nagasuporta sa immune system sa lawas.
