BUTUAN CITY – Gila-uman nang daan sa mga abogado ni Vice President Sara Duterte ang gihimo sa House Justice Committee pagdetermina nga duna’y probable cause ang duha ka impeachment complaints.
Sigon ni Engr Dioric Gavino, ang secretary general sa Sara All Movement, kung tan-awon ang procedure, klaro na nga scripted kini ilabina nga sila-sila na mismo ang naghimo og mga senaryo ug istorya tungod sa kawala nila’y lig-ong ebidensyang musuporta sa alegasyon.
Gawas matud nga milapas na sa reklamo ang gihimong pagtuki sa mga isyu tungod kay sila na mismo matud pa ang nagsige’g pangita ug panguha og managlahing impormasyon kansa usa ka klarong fishing expedition.
Wala matud pa’y hunong ang pagpangita sa komite og bisan unsa na lang nga ilang ma-ilad sa mga tawo aron himuong hugaw sa panan-aw sa mga Filipino ang besi presidente.
Gani gikataw-an lang ni Gavino ang pagpanghingusog sa komite kalabot sa kalawa matud pa’y batasan ni VP Sara tungod sa wala gayod pagtunga niini sa ilang mga clarificatory hearing nga alang kaniya, dapat lang.
Kini tungod kay nakita na sa tanan sa unang impeachment case ang ila usab nga kabastos dihang gitunga sila sa besi presidente ning mi-aging tuig.
Dili matud pa kini malimod sa komite tungod kay nasaksihan sa tanan ang ilang gihimong mga pagdungog kondiin bisan pa si Rep. Paolo Henry Marcoleta, dili na gani halos pasultihon ug barawon pa kansa timaan sa ilang dili kapatas.
Bisan ang chairman nga si Rep Gerville Luistro, klaro kaayo ang pagka-bias rason nga wala na’y la-umang impartiality tungod kay bisan sa sinugdanan pa lang, klaro na nga ang padulngan sa pagdungog, mao ang pagpa-impeach na sa besi presidente .
