BUTUAN CITY – Sulod sa daghang tuig, daghan ang nagtuo nga maayo sa lawas ang fish oil tungod kay daghan kini og omega-3 fatty acids.
Ang mga nag-unang pagtuon kaniadto nagbutyag nga makatabang kini sa pagpanalipod batok sa sakit sa kasingkasing, type 2 diabetes, arthritis, depresyon, ug mga sakit sa utok sama sa Parkinson’s disease ug Alzheimer’s disease.
Apan sa bag-ong pagtuon, nadiskubrehan sa mga tigdukiduki nga posibleng dili maayo ang fish oil supplements alang sa mga tawo nga duna’y balik-balik nga mild traumatic brain injuries kon TBI.
Sa ilang pagtuon gamit ang ilaga ug human brain cells, nakita nga ang sobrang pagtapok sa usa ka klase sa omega-3 fatty acid gikan sa fish oil mahimong makabalda sa brain healing ug makatabang sa pagtapok sa tau protein — usa ka timailhan nga konektado sa Alzheimer’s disease.
Sigon ni lead researcher Onder Albayram, bisan daghan ang nagtuo nga maayo ang fish oil, posible nga magkalahi ang epekto niini depende sa kahimtang sa lawas, ilabina panahon sa pag-ayo sa mga samad sa utok.
