BUTUAN CITY – Gikasuhan na sa Department of Environment and Natural Resources kon DENR-Caraga ang walo ka mga Chinese nationals ug napulo ka mga Pinoy nga ilang nadakpan sa gilusad nga anti-illegal mining operation ning mi-aging hapon sa Brgy Mabini, Surigao City, lalawigan sa Surigao del Norte.
Sa ekeklusibong pakighinabi sa Bombo Radyo Butuan, gipdayag ni Engr Francis Glenn Suante, officer-in-charge kon OIC regional director sa Mines and Geosciences Bureau kon MGB-Caraga, ilang napasaka ang kaso kagahapong adlawa human sa operasyon nga miresulta sa pagkakumpiska sa 15 ka mga backhoe uban sa pipila ka yunit sa mga dump trucks, pay loader ug generator sets.
Sa pagkakaron, usa pa lang ka dump truck ang gidala sa buhatan sa Department of Environment and Natural Resources kon DENR-Caraga dinhi sa dakbayan sa Butuan isip ebidensya samtang ang uban, atua pa sa mismong site ug gibantayan sa kapin napulo ka mga pulis samtang gihangyo pa ang lokal nga kagamhanan .
Gidugang ni Engr Suante nga kini matud pa nga gold mining ang pinakadakong operasyon nga ilang nalusad dinhi sa rehiyon.
Bisan matud pa supak sa balaud ang ilang gihimo, daghan gihapon nga mga local residents ang mulambigit niini tungod sa kamahal sa bulawan.
Sa pagkakaron, dili pa nila matumbok kung unsa na kadugay ang maong operasyon tungod kay nagpadayon pa ang ilang imbestigasyon.
