BUTUAN CITY – Wala pa gikutay sa Department of the Interior and Local Government (DILG) sa usa ka drug syndicate nga nakabase sa Davao, ang nakumpiskang P3.5-bilyones nga shipment sa shabu sa Laos.
Sumala ni Interior Secretary Jonvic Remulla, nakapokus ang imbestigasyon sa pag-ila sa mga indibidwal nga posibleng nalambigit, samtang natino na matud pa nga ang Golden Triangle mao ang gigikanan sa 521-kilo nga gituohang shabu.
Gi-ila sa mga awtoridad si kanhi Bangsamoro parliament member Edrieza Hadji Nasser Rimbang isip suspek nga gituohang nag-finance sa pagpa-andam sa usa ka pribadong eroplano nga unta magdala sa ginadiling droga gikan sa Laos paingon sa Manila.
Apan wala pa usab gisira sa mga imbestigador ang posibilidad nga adunay laing mga personalidad nga nalambigit.
Giklaro usab ni Remulla nga wala’y namugnang koneksyon kang kanhi Pangulong Rodrigo Duterte sa gika-ingong drug smuggling operation.
Padayon ang pag-ila sa Philippine National Police o PNP ug Philippine Drug Enforcement Agency o PDEA sa mga tawo nga posibleng nalambigit, lakip na ang pagsusi sa mga transaksiyong pinansyal, samtang gihulat ang resulta sa laboratoryo gikan sa Laos aron makumpirma ang nakumpiskang substansiya.
