BUTUAN CITY – Anaa na sa luwas nga kahimtang ang usa ka bag-ong himugso nga batang lalaki nga napalgang gibutang lang sa tangkal sa baboy likod sa usa ka panimalay sa nakalabay nga gabii sa may Purok-5, Barangay Maug, ning siyudad sa Butuan.
Sigon ni Sulpicio Catarman, 69-anyos ug tag-iya sa tangkal diin napalgan ang biktima, mata pa sila pasado alas 12:00 sa tungang gabii dihang nakadungog ang iyang umagad og tingog sa usa ka bata nga una niyang gitu-uhang iring lang.
Ila kining gisusi bitbit ang flashlight ingon man tubo aron magamit tungod sa pagtoo nga basin manti-anak kini.
Dinhi nila nakita ang usa ka bata nga nagdulog pa sa iyang inunlan nga gibutang sa tangkal sa baboy rason nga dali nila kining giplastar sa lamesa ug nanawag sa ilang silingan lakip na sa tanod nga maoy mikontak sa kapulisan hangtud nga nadala kini sa Butuan Medical Center.
Sumala pa ni Catarman, anaa na sa luwas nga kahimtang ang bata ug gitu-uhan niyang dayo ang inahan niini ug gituyo pagbutang sa panimalay nga mata pa ang mga nagpuyo niadtong higayona aron ilang makit-an.
