BUTUAN CITY – Mi-abot sa kinatibuk-ang 21.4-gramos sa suspected shabu nga gibana-banang mikantidad og ₱145,520.00 uban sa mga drug paraphernalia, ang nakumpiska sa gilusad nga drug buy-bust operation pasado alas-11:03 kagabii, Miyerkules, Oktubre 14, sa Purok 7, Brgy Banza ning siyudad sa Butuan.
Nakumpiska kini gikan sa posisyon nila alyas Bosing, 32-anyos, ug alyas Banny, 21-anyos, pulos ulitawo ug parehong mulupyo sa maong lugar.
Gilusad ang hini-usang operasyon sa mga sakop sa Regional Police Drug Enforcement Unit-13, apil na sa susamang yunit sa Butuan City Police Station 1 ug sa Philippine Drug Enforcement Agency kon PDEA-Caraga nga miresulta usab sa pagkasikop sa maong mga drug personalities.
Apil sa nakuha gikan sa ilang posisyon ang tinuod nga usa ka libo ka pisos nga kwartang papel nga maoy gigamit nga buy bust money; usa ka plastic container nga duna’y kolor blue nga cover, usa ka digital weighing scale, usa ka cellphone ug nagkada-iyang drug paraphernalia.
Gikostudiya na sa Regional Police Drug Enforcement Unit-13 ang nadakpang mga suspetsado ug ang nakumpiskang mga butang alang sa tukmang disposasyon ug dokumentasyon
