BUTUAN CITY – Gipugngan sa kadaghanan sa mga miyembro sa House Committee on Justice ang pag-abli sa kahon nga naglangkob sa tax returns ni Bise Presidente Sara Duterte ug sa iyang bana nga si Atty. Manases Carpio.
Sa pagbotar kaganina, 38 ka miyembro ang mibotar batok sa pag-abli sa kahon, samtang unom ra ang mipabor.
Sumala sa Bureau of Internal Revenue (BIR), ang mga dokumento mahimong ablihan lamang “in aid of legislation” ug sa executive session ug dili sa public hearing.
Tungod niini, nagpabiling selyado ang kahon nga gisubmite sa ahensya ning miaging semana.
Sigon ni Deputy Minority Leader Chel Diokno, igo na ang ebidensya aron makonsiderang duna’y probable cause ang pagpa-impeach kang Duterte bisan pa dili ablihan ang kahon.
Matod niya, mas maayo nga hulaton ang Senado isip impeachment court nga mao’y magbuot kung ablihan ba ang mga dokumento, isip pag-amping.
Uyon usab niini sila Deputy Speaker Janette Garin ug Rep. Benny Abante, sa rasong ang Kamara dili pa impeachment court, kondili naghimo pa lamang ug preliminary investigation.
Gisaway ni Senior Deputy Majority Leader Lawrence Defensor ang desisyon ug gitawag kini nga “betrayal of public trust” dungan sa pagbutyag nga ang dili pag-abli sa kahon daw pagtabon na amtud pa sa kamatuoran.
Samtang gibutyag usab ni Senior Deputy Minority Leader Leila de Lima nga ang Konstitusyon mao unta’y maghari ibabaw sa bisan unsang balaod sama sa National Internal Revenue Code (NIRC), ug dili unta limitahan ang gahum sa komite.
