BUTUAN CITY- Nagpasidaan si Dr. Karl Igrobay, Assistant Department Head sa Gensan City Health Office sa publiko nga mahimong magbinantayon batok sa “sore eyes” karong panahon sa ting-init, sanglit kini usa ka makatakod nga viral infection kansa daling mokatap pinaagi sa direktang kontak o paghikap sa mga butang nga adunay kagaw gikan sa natakdan nga tawo.
Sumala pa ni Igrobay, mahimong magbalik-balik ang maong sakit sa usa ka indibidwal, busa gi-awhag niini ang kanunay nga pagpanghugas sa kamot, paghilam-os, ug paglikay sa paghikap sa mata aron dili matakdan.
Bisan paman nga dali ra kining maay diin asa molungtad lang sulod sa pito ngadto sa 14 ka adlaw, angayan gihapon nga mag-amping tungod kay ang uban niini mahimong mosangpot sa seryosong bacterial infection kung dili maatiman og tarong ang personal nga kalimpyo sa lawas.
