BUTUAN CITY – Gibalibaran sa International Criminal Court o ICC Trial Chamber III ang hangyo sa kampo ni kanhi Pangulong Rodrigo Duterte nga limitahan lamang sa 10,000 ka items ang mga ebidensiya nga mahimong ipresentar sa prosekusyon sa iyang kaso nga crimes against humanity ug murder.
Gipagawas ang maong desisyon atol sa ika-upat nga status conference sa kaso, nga personal nga gitambongan sa kanhi pangulo didto sa The Hague, Netherlands.
Gisalikway usab sa korte ang hangyo sa depensa nga isubmite pag-usab sa prosekusyon ang mga ebidensiya pinaagi sa bag-ong case file sa Judicial Workflow Platform o JWP – ang opisyal nga digital system nga gigamit sa ICC sa pagdumala sa mga rekord ug dokumento sa kaso.
Base sa mga kaso nga gisang-at sa mga piskal sa ICC, nag-atubang si Duterte og tulo ka ihap sa krimen batok sa katawhan, nga may kalabotan sa gika-ingong mga pagpatay ug pagsulay sa pagpatay sa Pilipinas gikan Nobyembre 2011 hangtod Marso 2019 ubos sa iyang kampanya batok sa ilegal nga droga.
Sa pakighinabi sa Bombo Radyo Philippines, gipadayag ni Atty. Gilbert Andres, usa ka accredited lawyer sa ICC, nga dako ang mahimong implikasyon sa maong desisyon sa sunod nga mga lakang sa legal nga proseso ug sa dagan sa umaabot nga pagtaral batok sa kanhi pangulo.
