BUTUAN CITY – Nagsubo ang pamilya, kabanay ug higala sa usa ka biker nga nakabsan sa kinabuhi human nadumbulan sa Ford-Ranger Raptor ala 1:05 kagahapon sa sayo sa buntag.
Naila ang biktima nga si Raymond Galope Mantalaba, 23-anyos, ulitawo ug residente sa Purok-4 Brgy. Agao ning dakbayan sa Butuan samtang naila ang usab driver sa pick-up nga si Ikee Lee Benette Yu-Go, ulitawo, 32 anyos, residente sa T. Calo Extension, Brgy. Limaha ning dakbayan sa Butuan.
Migawas sa imbestigasyon nga samtang nagbisiklita ang biktima padulong sa amihanang bahin sa syudad kalit kining gidumbol sa FordRanger Raptor sa may South Montilla Boulevard atubangan sa usa ka simbahan sa Purok Pechay-A, Brgy. Golden Ribbon ning siyudad.
Nalagpot matod pa ang biktima tungod sa kakusog sa impact resulta sa na-angkong grabeng samad kondiin nadala pa kini sa Butuan City Medical Center apan gideklarang dead on arrival sa attending physician.
Nasuta usab sa imbistigasyon nga lango sa ilimnong makahubog ang driver sa maong pick-up nga karon gikustudiya na sa Police Station 1.
