BUTUAN CITY – Sangko sa langit ang kalipay ug pagpasalamat sa mga natunulan og hinabang bugas ug crutches kansa gipatunol sa pipila ka mga lungsunaron ug pribadong sektor sa Bombo Radyo alang niadtong mga kabus nga Butuanons.
Kini isip kina-ugalingong paghatag og ayuda ning sibyahan niadtong mga kabus nga Butuanon nga apektado sa COVID-19 ilabina niadtong wala makadawat og ayuda gikan sa barangay ug siyudad apil na sa Special Amelioration Program kon SAP sa nasudnong kagamhanan.
Sa pakighinabi kang Nanay Ceria Perolino sa Brgy. Holy Redeemer ning dakbayan sa Butuan, emosyunal niining gipadayag nga sa pagkakita pa lang niya nga nagbit-bit ang mga reporters sa Bombo Radyo Butuan og lima ka kilong bugas ingon man pares sa crutches alang kaniya, nga hingpit ang iyang kalipay sa wala lauming mga hinabang.
Sumala ni Perolino dako kaayong tabang ang gitunol kaniya labi nga dugay na siyang migamit sa tubo sa payong isip iyang sungkod ug karon hingpit nang natuman ang iyang pangadoy nga makabaton og bag-ong crutches tungod sa Bombo Radyo..
Gawas kang Perolino natunolan usab ang ubang indibidwal ug bugas gikan sa managlahing barangay ning dakbayan.
