BUTUAN CITY – Nagsang-at ang Office of the Ombudsman sa Sandiganbayan og precautionary hold departure order (PHDO) batuk nila Senador Francis “Chiz” Escudero ug negosyanteng si Maynard Ngu.
Kini taliwa sa nagpadayon nga pagligid sa imbestigasyon sa maanomalusong flood control projects.
Sa gipagawas nga “verified ex-parte application” para sa pagpagawas sa travel ban order, gibase sa Ombudsman, isip petitioner, ang nahimong lakang niini sa Section 3, Rule VIII sa 2018 Revised Internal Rules sa Sandiganbayan.
Nakalatid sa nasangpit nga probisyon nga sa precautionary hold departure order gitahasan ang Bureau of Immigration nga pug-ngan ang bisan unsang pagsulay sa mga indibidwal nga gidudahang sa krimen nga makagawas sa Pilipinas.
Gi-isyu kini sa mga kaso may kalabutan sa mga krimen nga dunay minimum penalty nga unom ka tuig og usa ka adlaw.
Sa kasamtangan, nag-atubang sila Escudero ug Ngu sa imbestigasyon sa matud pa plunder, graft ug indirect bribery mahitungod sa flood control scandal.
Gi-raffle usab sa Sandiganbayan Sixth Division ning hapon ang hangyu alang sa pagpagawas og travel ban order batuk nila Escudero ug Ngu.
Mahinumdumang gibulgar ni kanhe DPWH USec. Roberto Bernardo nga gipaagi niya kang Ngu ang 20% sa pondo o kapin 160-milyones pesos gikan sa 800 milyones pesos nga proyekto para sa Valenzuela nga gigahin alang kang Sen. Escudero apan gilimod sa negosyante nga nalambigit siya sa flood control kickbacks.
Samtang ginegar usab ni Escudero ang mga alegasyon ni Bernardo nga nalambigit siya sa anomalusong proyekto.
