BUTUAN CITY – Gihingusgan karon sa Teachers’ Dignity Coalition nga iprayuridad sa gobyerno ang paggahin og pundo alang sa 15-mil pisos nga across the board wage increase sa mga magtutudlo sa mga pampublikong tunghaan kansa gitawag nilang pinakamaayong investment alang sa atong nasud.
Sigon ni Teachers’ Dignity Coalition chairman Benjo Basas, panahon na aron tas-an ang sweldo sa mga empleyado sa Department of Education ilabina nga apil sila sa duna’y pinaka-ubos nga suhulan sa mga government professionals.
Gipadayag pa ni Basas nga nasayod ang kasamtangang administrasyon sa panginahanglan sa mga magtutudlo dayong pasabot nga anaa lang sa 210-bilyunes pisos ang budget requirement alang sa gipangayo nilang umento.
Base sa nag-ong-ong nga sugyot sa usbaw sa suhulan didto sa Senado ug Kamara, gisugyot sa grupo nga mahimong tungaon ang usbaw sa tulo ka tranche kung dili makaya sa usa lang ka agi-an.
Niini nga scheme mahimong sais-mil pisos ang ihatag nga usbaw sa mga magtutudlo sa unang tuig, sundan sa 5-mil pisos sa sunod tuig ug 4-mil pisos na usab sa musunod pang tuig.
Sigon ni Basas, gamay ra kaayo ang maong pundo kung ikumpara sa ubang alokasyon sa mga laing ahensya sa gobyerno sama sa gipanggahin sa infrastructure projects nga nahurot lang og kurakot.
Karong hapit na usab ang deliberasyon sa 2027 budget, padayon ang panawagan sa grupo ngadto sa gobyerno nga pamatud-an ang saad ug simpatiya niini sa sektor sa edukasyon.
