BUTUAN CITY – Target sa administrasyon ni Pangulong Ferdinand Marcos Jr. nga makuha-kuhaan ang kagutom sa nasud pinaagi sa regular nga pagpanghatag og bugas sa matag-pamilyang Pilipino kada-duha ka buwan kon unom ka higayon kada-tuig.
Sigon sa pangulo, pangandoy niya nga wala na’y Pilipinong magutman sukad siya milingkod sa puwesto.
Gipaniguro sa administrasyon ang pagpatuman sa mga programang maghatag og igong pagkaon ug suporta sa mga pamilyang Pilipino.
Ang maong lakang kabahin sa mas lapad nga kampanya batuk sa kakabus ug kagutom taliwa sa mga hagit sa ekonomiya.
Nasayrang usa sa nag-unang mga adbokasiya ni Marcos Jr. ang food security ug pagpakusog sa agrikultura aron masiguro ang malahutayong suplay sa pagkaon alang sa tanang sektor sa katilingban.
Gipamugos sa pangulo nga importante ang panaghi-usa sa gobyerno ug katawhan, aron makab-ot ang estado sa nasud nga wala’y magutman.
