BUTUAN CITY – Gipa-imbestigahan na sa probinsyal nga panggamhanan sa Agusan del Sur ang nadawat nilang reports nga duna’y mga homestays nga nagpataas og maayo sa ilang singil alang niadtong gustong mu-istar sa mga lungsod sa lalawigan aron mutan-aw sa Palarong Pambansa 2026.
Sigon ni Governor Santiago ‘Santi’ Cane Jr, dili nila i-tolerate ang maong klase sa pagpangabuso ngadto sa mga turistang gustong musaksi sa ika-66 nga edisyon sa maong padula.
Gipahibalo usab sa gobernador ang mga taga-laing lugar nga gustong mag-homestay nga bisitahon lang ang ilang Facebook page aron dili mabiktima sa mga sakay sa panahong negosyante ug dili makig-deal niadtong mga nanag-iya sa facilities nga wala mu-agi sa ilang briefing ug seminar.
Nagbahad usab sa maong mga indibidwal nga dili isabotahe ang nasudnong kalihukan aron lang paka-ulawan ang provincial government tungod kay ila matud pang matilawan ang silot sa balaud.
