BUTUAN CITY – Gibalhin na sa Regional Trial Court sa Mandaluyong City ang pito ka tuig nang kasong libel batok kang kanhi Senador Antonio Trillanes IV nga orihinal nga gisang-at nila Davao City 1st District Paolo “Pulong” Duterte ug Atty. Manases Carpio niadtong 2018.
Sumala pa, anaa pa kini sa proseso sa raffle aron matino kung kinsa nga huwes ang mudumala sa pagdungog sa Mandaluyong.
Ang kaso mugna sa mga pahayag ni Trillanes niadtong 2018 nga nag-alegar sa mga complainants nga mga drug lords matud pa, kansa malisyoso, wala’y kamatu-uran ug nakadaot sa ilang reputasyon.
Madumdumang niadtong Hulyo 2025, mitambong si Trillanes sa pagdungog sa Davao City RTC sa wala pa gibalhin ang venue sa kaso kondiin iyang gibarugan nga ang iyang mga pahayag sakop sa freedom of speech ug adunay kalabutan sa interest sa publiko dayong butyag nga gisulayan siya nga pahilomon.
Apan, sumala sa pipila ka observers, ang kadugayon sa proseso nga hapit na moabot og walo ka tuig nagpakita nga normal nga nagdagan ang proseso sa hustisya.
Gilauman nga mopadayon ang mga pagdungog sa kaso higayong duna na’y matudlo nga huwes pinaagi sa raffle.
Samtang, gikatakdang motambong si Trillanes sa pagdungog sa House Committee on Justice kabahin sa impeachment complaint batok kang Vice President Sara Duterte-Carpio karong semanaha.
