BUTUAN CITY – Gianunsyo ni U.S. President Donald Trump ang tulo ka adlaw nga ceasefire tali sa Russia ug Ukraine gikan sa Mayo 9 hangtud sa Mayo 11 isip paghandum sa pagtapos sa ikaduhang gubat sa kalibutan para sa Russia.
Sa iyang post sa Truth Social, gibutyag ni Trump nga lakip sa ceasefire ang temporaryong paghunong sa tanang opensibang militar ug pagbinayloay sa tag-usa ka libo nga binilanggo gikan sa matag nasud.
Una nang gibutyag ni Trump nga dunay gihimong panaghisgut alang sa temporary ceasefire human ang iyang pakig-estorya kang Russian President Vladimir Putin niadtong Abril 29.
Dungan niini, nagdeklara usab ang Russia og kaugalingong ceasefire gikan sa Mayo 8 hangtud sa Mayo 9 isip kabahin sa paghandum niini sa kadaugan sa Soviet Union batuk sa Nazi Germany niadtong World War II.
Samtang gisugyot usab sa Ukraine ang open-ended ceasefire nga nagsugod niadtong Martes ug nanawagan sa Russia nga musunod usab sa nasangpit nga lakang.
Gawas niini, miabot na usab sa Miami ang nag-unang negotiator sa Ukraine nga si Rustem Umerov para sa serye sa pagpulong kauban ang mga representante sa Estados Unidos.
Bisan paman niini, nagpabiling wala nagkasinabot ang duha ka panig ilabina sa hisgutanan sa Donetsk region sa sidlakang parte sa Ukraine. Padayon usab nga giakusahan sa Moscow ug Kyiv ang usa’g usa sa paglapas sa mga naunang ceasefire declarations.
