BUTUAN CITY – Giklaro ni Glizriel Rose Quijada, ang head sa economic and Financing Learning Center sa Bangko Sentral ng Pilipinas kon BSP-Butuan nga hangtud sa pagkutlo niini nga balita, wala pa’y gipagawas nga bag-ong advisory ang ilang sentrong buhatan kalabot sa mga kwartang gigamit karon sa sirkulasyon ma-papel man o polymer banknotes.
Tungod niini, ang ilang guidelines nga gisunod nagbase gihapon sa BSP Circular No. 829 nga niadto pang tuig 2014 gipagawas.
Kalabot sa trending karon nga isyu sa bag-ong 1,000-peso polymer banknotes nga gika-ingong dili dawaton sa mga retailers kung mapilo, gipasabot ni Quijada nga ang mga banknotes nga nag-circulate karon sa merkado, duna’y tulo ka kategoriya nga mao ang fit, unfit ug mutilated.
Kadtong mutilated kon grabe na ka unfit nga kwarta alang sa sirkulasyon mao kadto ang dili dawaton samtang ang pagkapilo sa kwarta apil na kung nasulatan og gamay, mabutang kini sa kategoriyang unfit kansa mahimo gihapong gamiton sa sirkulasyon o dawaton gihapon, apan kinahanglan nang isurender aron mabayluan og fit nga kwarta.
Gipasabot usab niini nga ang pagpagawas sa BSP og guidelines gibase na sa 49 ka tuig na nga Presidential Decree 247 kansa mas nailang Anti-Mutation Law kon nagdili sa paggara-gara sa kwartang papel sama sa pagsulat niini, paggunting, pagsunog, pagkumot, pagpilo ug uban pa.
Diha matud pa sa pagpilo sa kwarta ilabina sa polumer banknotes kansa gama sa plastic, mugama kini og markings nga mao na’y magpadali sa pagkagisi niini.
