BUTUAN CITY – Gikasubo og samot sa transport sector ning siyudad sa Butuan ang laing hugna na usab sa usbaw sa presyo sa mga produktong petrolyo nga misugat sa katawhan ning unang adlaw sa buwan sa Marso.
Nasayrang ang Blue Energy nagpatuman na og 60.95-sentabos nga presyo sa kada-litro sa ilang special samtang 60.75 usab sa ilang regular ug 54.92 sa kada-litro sa ilang diesel.
Ang Shell, mi-abot na sa 58.65 ang kada-litro sa ilang diesel; 64.65 usab sa kada-litro sa ilang regular; 66.05 sa kada-litro sa ilang special ug 69.56 sa kada-litro sa ilang gas.
Ang Petron usab, mapalit na sa 62.15 ang kada-litro sa ilang regular; 62.90 ang kada-litro sa ilang special ug 56.38 ang kada-litro sa ilang diesel.
Samtang sa Flying V, mi-abot na 54.92 ang kada-litro sa ilang diesel, 59.75-sentabos usab sa kada-litro sa ilang regular ug 60-pesos ang kada-litro sa ilang diesel.
Nasayrang kini na ang ikasiyam nga hugna sa pagsaka sa presyo sa mga produktong petrolyo karon lamang tuiga.
Gikumpirma ni Butuan United Tricycle Federation kon BUTF President WIlfredo Ybañez Jr., nga dugang palas-anon na usab alang kanilang mga transport drivers ang pinaka-ulahing usbaw sa presyo sa mga produktong petrolyo.
Sa eksklusibong pakighinabi sa Bombo Radyo Butuan, gipadayag ni Ybañez nga sila kanunay ang madakdakan niini tungod kay sila man ang kanunay nga magpatubil aron makapamasada.
Dungan niini, gipadayag usab niyang apil sa mag-antus niini ang mga sumasakay ilabina kung sanungon na ang ilang hangyong usbaw usab sa plitihan.
Gawas niini, maka-apekto usab kini sa presyo sa mga nag-unang palaliton nga mu-igo sa tanang sektor sa katilingban.
Hangtud karon, padayon pa nilang gipa-abot nga sanungon na sa Sangguniang Panlungsod ang ilang hangyong usbaw sa plitehan aron makasugakod sila sa inadlaw nilang kita nga sa pagkakaron, mu-abot na lang matud pa sa 200-pesos ang ilang madala sa pagpa-uli.
Gitin-aw pa ni Ybañez nga bisan og ma-aprubahan na ang ilang hangyo, dili pa gihapon kini igo tungod kay ila kining giduso nilang higayo nga wala pa misaka og pila ka higayon ang presyo sa mga produktong petrolyo.
