BUTUAN CITY – Negatibo sa paggamit og ilegal nga druga ang 47 sa 48 ka mga personahe sa Butuan City Jail ug 160 ka mga persons deprived of liberty kon mga piniriso nga mipa-ilalom sa compulsory drug test sa Philippine Drug Enforcement Agency kon PDEA-Caraga kaganinang buntag.
Sigon ni Jail Supt. Bernie Ruiz, ang 160 ka mga PDLs kon pinirisong gi-drug test, 30-porsiento lang sa kinatibuk-ang 523 nila ka mga binilanggo nga gipili sa taga-PDEA gikan sa gihatag kanilang master list.
Sigon sa opisyal, tumong niini nga matuldukan na ang nanggawas nga mga istoryang duna matud pa’y ilang personahe ug pipila ka pinirisong mugamit niini dungan sa pagpasabot nga wala ma-drug test ang usa sa ilang personahe tungod kay naghatud kini sa lubong sa iyang parente.
Una nang giklaro ni Butuan City Jail Warden Joven Auza nga ang ilang mga personaheng magpositibo sa drug test, pasakaan nila og kasong kriminal ug administratibo nga kung mapamatud-ang migamit gyod sila, posibleng tangtangon pa sa serbisyo samtang ang mga pinirisong magpositibo usab sa drug test, ipa-ilalom sa therapeutic community modality program.
