BUTUAN CITY – Gipasigarbo ni Police Major Dorothy Tumulak, tigpamaba sa Police Regional Officer kon PRO-13, ang e-warrant system nga gipatuman sa Philippine National Police kon PNP nga maoy nahimong dalan sa malampusong pagkasikop sa magti-ayong sila Surigao del Sur Vice Governor Librado Navarro, 64-anyos ug asawa niining si Councilor Maylene, 47-anyos, parehong residente sa Ericson Subdivision, Brgy. Poblacion, Bislig City.
Sa eksklusibong pakighinabi sa Bombo Radyo Butuan, gibutyag ni Major Tumulak, higayong ma-upload na ang warrant of arrest sa e-warrant system, makita na kini sa tanang kapulisan sa nasud rasong mas ma-monitor nila kung duna ba’y residente sa ilang area of responsibility nga nag-atubang og kaso.
Madumdumang nadakpan sa ginsakpan sa Bislig City Police Station ang magti-ayon pasado alas-10:30 ning mi-aging gabii sa may Sitio San Andres, Brgy. Maharlika sa susamang siyudad tungod sa warrant of arrest nga gipagawas ni Judge Judy Sia Galvez, presiding judge sa Regional Trial Court, Branch 42 , 10th Judicial Region nga nakabase sa Medina, Misamis Oriental.
Sumala pa ni Tumulak, nag-resign sa iyang pagka Sangguniang Bayan member sa Talisayan, Misamis Oriental ang asawa nga si Maylene sa nakalabay nga tuig.
Mahinumdumang kagahapong adlawa hingpit nang na-turn-over sa Bislig City Police Station ang mga na-aresto ngadto sa korte nga nag-isyu sa warrant.
