BUTUAN CITY – Lauman ang padayon pang pagsaka sa mga kaso sa COVID-19 dinhi sa Caraga region sa musunod nga usa ngadto sa duha ka buwan, human nga na-detect na ning rehiyon ang mas paspas mga makatakod og delikadong Delta variant.
Sa eksklusibong pakighinabi sa Bombo Radyo Butuan, gipadayag ni Dr. Dioharra Aparri, ang cluster head sa Regional Epidemiology and Surveillance Unit kon RESU sa Department of Health-Caraga, kini na ang ikaduhang endorsement nga ilang nadawat gikan sa ilang sentrong buhatan nga duna’y na-detect nga 36 ka mga variants of concern nga kadaghanan mga Delta variants kansa mi-abot sa 31 ug dayon ang 3 ka Alpha kon UK variants ug duha ka Beta kon South African variants.
Gipadayag ni Dr. Aparri nga kini nga mga resulta, gikan kini sa 400 ka mga samples nga ilang gipadala ngadto sa Philippine Genome Center niadtong Agusto ug kagahapon pa lang migawas.
Gikumpirma niining sa 36 ka mga kaso sa variants of concern, 33 ang hingpit nang nakarekober ug tulo ang namatay.
As of kagahapong adlawa, naghulat na lang sila sa resulta sa 303 ka mga specimen nga ilang gipadala ngadto sa Philippine Genome Center wala pa’y labot sa pending nga anaa sa ilang storage room human nga duha ka semana nang mipaspas ang pagpadala og specimen tungod sa kadaghan na sa mga napadala ngadto sa PGC. Anaa matud pa sa katawhan ang yawe sa pagpakunhod sa transmission sa coronavirus pinaagi sa istriktong pagsunod gihapon sa mga minimum health protocols.
Gipadayag ni Aparri nga kung padayong magmagahi ang katawhan ug balewalaon lang gihapon ang mga health protocols, posibleng hangtud pa sa Disyembre kita mag-antus sa padayong pagtaas sa mga kaso sa COVID-19.
