BUTUAN CITY – Wala’y nadalang bisan usa man lang ka gamit ang pamilya Cantila human gilamoy sa kalayo ang ilang panimalay kaganinang alas-sais sa buntag sa may Purok 4, Sitio Sta. Cruz, Brgy. Manila de Bugabos ning syudad sa Butuan.
Sa eksklusibong pakighinabi sa Bombo Radyo Butuan, gipadayag ni Emiliano Cantila nga didto silang tanan sa ilang banlag sa may Brgy. Dulag aron bantayan ang ilang tindahan og duha lang niya ka mga batang apo ang nabilin.
Base sa iyang inisyal nga nasayran, nagduwa-duwa matud pa og lighter ang iyang 5-anyos nga apo hangtud nga midako na ang kalayo og naglumba na matud pa sila pagpanggawas tungod sa kahadlok.
Dili pa mabana-bana ni Cantila kung pila ang kinatibuk-ang damyos sa na-abo niya nga panimalay kansa gama sa mga ginabas nga kahoy ug apil pa sa nasunog ang duha nila ka mga TV sets, washing machine ug mga cell phones sa iyang mga anak.
Plano nila karon nga adto una sila sa ilang banlag magpuyo samtang ayum-ayumon pa ang pagpabarog og balik sa ilang kapuy-an.
