BUTUAN CITY – Gibulgar sa usa ka resource person nga nagpa-ilang si Bernard Gumban nga duha ka higayon siyang naghatod og mga maleta nga dunay sulod nga kwarta kang Senador Erwin Tulfo.
Sigon ni Gumban, nga miyembro sa “18 Ex-Marines,” duha ka maleta ang iyang unang nahatod.
Ang mga gagmay nga maleta matud pa sagad dunay sulod nga dili moubos sa 20 milyones hangtud sa 25 milyones pesos samtang ang medium sized nga maleta mamahimong dunay sulod nga 40 milyones hangtud sa 50 milyones pesos.
Base sa iyang pagbana-bana ang unang delivery nagkantidad og 60 milyones pesos ug 70 milyones pesos.
Sa ikaduhang higayon, gibutyag ni Gumban nga unom ka maleta usab ang iyang nahatod.
Gibana-bana niyang ang katibuk-ang kantidad sa sulod niini mamahimong muabot hangtud sa 150 milyones pesos.
Sumala pa sa resource person, ang mga nasangpit nga maleta gihatod sa balay ni Sen. Tulfo sa Greenhills.
Nasayrang lakip matud pa sa nakadawat sa minaletang kwarta mao sila Sen. Vicente Sotto III, og si kanhe senador og karun ML Partylist Rep. Leila De Lima.
Bisan ang pipila ka kanhe progressive lawmakers sama ni Rep. France Castro nalitok usab sa pamahayag sa mga kanhe sundalo.
