BUTUAN CITY – Dili na mamahimong makagawas sa nasud si Sen. Francis “Chiz” Escudero ug higala niining negosyante nga si Maynard Ngu human nga mag-isyu og Precautionary Hold Departure Order (PHDO) ang Sandiganbayan 6th Division.
Ang HDO dunay kalabutan sa pagkalambigit nila Escudero ug Ngu sa flood control kickback scheme.
Nasayran nga giaprubahan sa Sandiganbayan ang hangyu sa Office of the Ombudsman alang sa pagpagawas sa PHDO batuk sa duruha.
Si Escudero ug Ngu ang gika-ingong sood nga managhigala.
Si Ngu ang gitudlo ni kanhe DPWH Undersecretary Roberto Bernardo nga gihatagan niya sa 280 milyones pesos nga pondong commitment sa senador. Si Ngu matud pa ang bagman ni Escudero.
Sigon usab ni Bernardo nga gipangayu sa iyaha ni Ngu ang listahan sa mga lugar nga gastusan sa 1.4 bilyones pesos nga pondo para sa Valenzuela, Quezon City, Marinduque ug Oriental Mindoro.
Sumala ni Justice Bernelito Fernandez, wala pay nasang-at nga kaso batuk nila Escudero ug Ngu mahitngod sa Flood Control mess.
Makuti matud pa ang gihimo pagimbestiga tungod kay basin dunay mga sensitibong impormasyon mahitungod sa flood control controversy.
Niadtong Abril 2026, si Escudero nabutang sa seryosong alegasyon human nadamay ang pangalan sa maanomalusong multi-billion peso flood control projects.
Gika-ingong kini midawat og kickbacks gikan sa matud pa contractor nga si Lawrence Lubiano nga nag-donate og 30 milyones pesos sa iyang pagdagan niadtong 2022 elections.
Una nang ginegar ni Escudero ang pasangil ngadto kaniya.
