BUTUAN CITY – Nagpasidaan si Senador Erwin Tulfo nga mamahimo niyang ipadakop ang bisan kinsang senador nga magpahigayon og pagdungog sa Senate Blue Ribbon Committee nga walay pagtugot gikan kaniya tungod kay siya matud pa ang lehitimong chairman sa komite.
Gihimo ni Tulfo ang pamahayag human sa gihimong pagdungog sa Cayetano bloc niadtong Hunyo 4 diin gipangunahan nila Senator Pia Cayetano ug Senator Rodante Marcoleta ang nasangpit nga hearing.
Mahinumdumang mitestigo ang pipila ka kanhe miyembro sa Philippine Marines ug giakusahan ang ubang pulitiko ug indibidwal nga midawat matud pa og mga minaletang kwarta.
Lakip sa mga gipanganlan si senator Erwin Tulfo ug kanhe Senate President Vicente ”Tito” Sotto III.
Hugot nga gipanghimakak kini ni Tulfo ug iyang gipamugos nga walay igo nga ebidensiya nga mosuporta sa mga alegasyon sa mga kanhing sundalo. Sumala niini nga nag-andam na siya sa pagsang-at og kaso nga libel batok sa mga tawo nga kaniadto nagpailang mga bagman ni kanhing Elizaldy Co, nga mas nailhan isip “Zaldy” Co.
Gitawag usab ni Tulfo sa usa ka interbyu nga usa ka sham hearing o peke nga pagdungog ang gihimo sa paksyon ni Alan Peter Cayetano. Sumala sa senador, wala kini awtorisado sa kasamtangang liderato sa Senado ug wala usab kini mosunod sa mga lagda sa Blue Ribbon Committee.
Dungan niini, nagpasidaan si Tulfo nga dili niya tugotan ang bisan unsang susamang pagdinig sa umaabot ug gisubli ang iyang pahayag nga kung dili maaresto ang maong tawo, siya mismo ang mobitbit niini paggawas sa plenaryo.
