BUTUAN CITY – Pirmado sa 22 ka mga senador ang gidusong resolusyon ni Senador Raffy Tulfo alang sa temporaryong pagsuspende sa pagpatuman sa Public Transport Modernization Program (PTMP) kansa mas naila kaniadtong PUV Modernization Program.
Apil sa mga nag-author sa Senate Resolution No. 1096 uban kang Tulfo sila Senate President Francis Escudero, Majority Leader Francis Tolentino, Minority Leader Aquilino Pimentel, Pro Tempore Jinggoy Estrada; ingon man sila Senador Nancy Binay, Alan Peter Cayetano, Pia Cayetano, Ronald Dela Rosa, Loren Legarda, Imee Marcos, Robin Padilla, Grace Poe, Bong Revilla, Joel Villanueva, Cynthia Villar, Mark Villar ug Juan Miguel Zubiri.
Madumdumang atol sa Senate hearing sa Committee on Public Services nga gipangunahan ni Tulfo niadtong Hulyo 23, iyang nasuta nga wala sa plano ang modernization program ug gidali-dali.
Nakalatid sa resolusyon nga kinahanglan ang subsob nga review ug pag-eassess sa impact sa maong programa aron mawala ang kabalaka sa mga drivers ug mga transport operators nga maoy direktang magbago sa implementasyon niini.
