BUTUAN CITY- Gisiguro sa Palasyo Malakanyang nga magpabiling lig-on ang presyo sa mga palaliton sa nasud hangtud Abril 16, 2026. Kini subay sa padayon nga pakig-coordinar sa Department of Trade and Industry kon DTI sa mga dagkong manufacturer.
Atol sa Press Briefing sa Malakanyang gitaho ni Palace Press Officer USec. Claire Castro, nga ang maong kasabotan parte sa programang Unified Package for Livelihoods, Industry, Food, and Transport kon UPLIFT sa Administrasyong Marcos.
Sigon ni Castro, nga base sa taho ni Trade Secretary Cristina Aldeguer-Roque kang President Marcos nga mingsaad ang mga manufacturer nga dili sila mopatuman og Price Increase hangtud April 16.
Isip parte sa pagmonitor, mopahigayon usab ang Department of Trade and Industry og weekly monitoring sa mga merkado. Gilaoman usab ang pakigmeeting pag-usab ang DTI sa mga producer ug manufacturer aron nga masigurong dili mosaka ang presyo sa mga palaliton taliwala sa padayon nga pagsaka sa presyo sa lana.
Gi-angkon usab ni Castro, nga bisan paman adunay mga pwersa sa pangkalibotanong Merkado nga dili kayang magpugngan sa gobyerno, buhaton matud pa sa ahensya ang tanan aron dili kini bug-at sa mga palas-anon sa katawhan.
