BUTUAN CITY- Napildi ang Pinay Tennis sensation nga si Alex Eala sa unang hugna sa Strasbourg Open sa France niadtong Lunes sa gabii (oras sa Manila) human mapildi sa Ukrainian qualifier nga si Oleksandra Oliynykova sa iskor nga 6-3, 5-7, 3-6.
Si Eala, nga ulahi nang napasulod sa main draw sa WTA 500 tournament, nakigbisog pag-ayo ilabina sa ikaduhang set diin iyang nabawi ang 40-love ug 4-0 nga kakulangan aron matabla ang duwa sa 5-5, apan nakapadayon gihapon si Oliynykova aron mapugos ang deciding set.
Sa ikatulong set, nakabintaha pa si Eala og 3-2 ug adunay higayon sa break point, apan mibalik ang kusog sa Ukrainian player nga nakakuha sa usa sa labing dakong kadaugan sa iyang karera.
Human sa duwa, emosyonal nga gipahayag ni Oliynykova nga dako ang iyang inspirasyon gikan sa iyang amahan kinsa usa ka sundalo nga nagdepensa sa Ukraine ug ming-abot sa France aron motan-aw sa iyang sunod nga duwa. Bisan sa kapildihan, si Eala, nga misaka na sa World No. 38 sa pinakabag-ong WTA rankings, magpadayon sa pagpangandam alang sa umaabot nga French Open karong bulana.
