BUTUAN CITY- Gikomperma sa Philippine National Police (PNP) niadtong Martes nga nakit-ang mingsibat si Senador Ronald “Bato” dela Rosa sulod sa Senado human ang insidente sa pagpamusil niadtong Mayo 13, 2026, sakay sa sakyyanang nakarehistro kang Senador Robin Padilla.
Sa gihimong Press Conference sa Palasyo, gipakita ni PNP chief Gen. Jose Melencio Nartatez Jr. ang video footage sa usa ka puti nga Toyota Fortuner nga minggawas sa Senado sa may alas-2:30 sa sayong kabuntagon niadtong Huwebes, Mayo 14.
Wala pa gipagawas sa PNP sa media ang kinatibuk-ang video kansa nagpakita matud pa kang dela Rosa nga minglakaw sa Senado.
Dugang pa sa opisyal, base sa records inquiry sa PNP, nakapangalan kang Padilla ang maong sakyanan.
Gikomperma usab ni Interior Secretary Jonvic Remulla nga gipanag-iyahan ni Padilla ang sakyanang nakita sa footage.
Una nang gi-angkon ni Padilla nga iya ang sakyanang anaa sa video, apan mingbalibad kini sa pagkumpira kung sakay ba niini si dela Rosa.
Kahinumdumang niadtong Mayo 11, nagpakita na usab si dela Rosa sa Senado sa unang higayon sukad Nobyembre 2025 aron moboto pabor sa pag-ilis og liderato sa Senado.
Human makuha sa iyang mga kaalyado ang kontrol sa liderato sa Senado, gi-aprobahan gilayon ang mosyon aron ibutang si Dela Rosa sa protective custody sa Senado.
Nagsugod kini human gikomperma sa International Criminal Court (ICC) nga nagpagawas kini og warrant of arrest batok kang Dela Rosa kalabot sa daw papel niini sa war on drugs sa administrasyong Duterte niadtong kini pa ang hepe sa PNP.
