BUTUAN CITY – Gipadayag ni Philippine National Police kon PNP Chief General Jose Melencio Nartatez Jr. nga base sa nakita nilang CCTV footage, nakita nga sila Senador Ronald “Bato” dela Rosa ug Robin Padilla migawas sa Senado pasado alas-2:30 sa kaadlawon niadtong Mayo 14, pipila lang ka oras human sa insidente sa pagpamusil sulod sa Senado.
Base sa CCTV footage, nisakay sila sa puting Fortuner nga nakapangalan kang Padilla.
Sigon usab sa Malacañang, si dela Rosa mihawa sa Senado sa sayong kabuntagon samtang anaa sa protective custody tungod sa warrant gikan sa International Criminal Court o ICC.
Wala pay impormasyon kung asa padulong ang sakyanan o kung adunay lain nilang kauban.
Niadtong Lunes, mitambong si Padilla sa sesyon sa Senado isip impeachment court, ug nagbutyag nga ania gihapon si dela Rosa sa Pilipinas apan wala siya kahibalo kung asa kini karon.
Samtang sigon ni National Bureau of Investigation kon NBI Director Melvin Matibag nga “person of interest” si Padilla sa pagkawala ni dela Rosa gikan sa Senado ug kinahanglan kining pangutan-on kay siya ang kataposang nakita nga kauban sa senador sa wala pa kini nawala sa Senate premises.
