BUTUAN CITY – Miabot na sa kapin 100 ang namatay ug kapin 390 ang gidudahang dunay kaso sa Ebola sa Democratic Republic of Congo (DRC), sumala sa Africa Centres for Disease Control and Prevention.
Natala na usab ang virus sa Uganda diin dunay duha ka kumpirmadong kaso ug usa ang namatay.
Lakip sa mga kumpirmadong natakdan ang usa ka Amerikanong doktor sa Congo nga ipaagi sa Germany para sa tukmang medikasyon.
Gitaho usab nga pipila ka Amerikano ang posibleng na-expose sa virus nga kasamtangang gitabangan sa gobyerno sa Estados Unidos.
Una nang gideklara sa World Health Organization (WHO) ang outbreak isip public health emergency of international concern apan halayo ra nga mahimong pandemic.
Bisan paman nini gipasidaan ang hugot nga pagsunod sa mga patakaran ilabina sa pag-lubong sa mga namatay tungod sa taas ang risgo nga mokaylap ang virus.
Nagpatuman usab og border screening ang mga kasikbit nga nasud sama sa Rwanda ug Nigeria isip lakang sa paglikay sa virus.
Sumala sa US Centers for Disease Control and Prevention (CDC), ubos ang kakuyaw niini sa Amerika apan ilang gimonitor ang mga biyahero gikan sa apektadong lugar nga miabot sa U.S.
Gawas niini nagpagawas usab ang Estados Unidos og Level 4 travel advisory, ang pinakataas nga pasidaan sa pag-adtu sa Congo.
Sa kasamtangan, wala pay aprubadong tambal o bakuna batuk sa Bundibugyo strain sa Ebola rasong nananawagan ang Africa CDC ug WHO sa publiko nga sundon ang mga protocol ug pakusgon ang surveillance sa komunidad aron mapug-ngan ang pagkaylap sa virus.
